மார்ச் 15 அன்று, அமெரிக்க இராணுவம் யேமனின் தலைநகரான சனாவில் குடியிருப்பு பகுதிகள் மீது வான்வழித் தாக்குதல்களை நடத்தியதில் ஆண்கள், பெண்கள் மற்றும் குழந்தைகள் உட்பட 53 பேர் கொல்லப்பட்டனர். இலக்கு வைக்கப்பட்டவர்களில் ஹூதி அரசாங்கத்தின் அரசியல் தலைவர்களும் அடங்குவர். மத்திய கிழக்கின் மிக ஏழ்மையான நாடான யேமன், சவுதி அரேபியாவின் கைகளில் பல ஆண்டுகளாக அமெரிக்க ஆதரவுடனான குண்டுவீச்சு, மற்றும் வேண்டுமென்றே திணிக்கப்பட்ட பட்டினியால் பாதிக்கப்பட்டுள்ளது. இதன் விளைவாக 400,000 க்கும் மேற்பட்ட அப்பாவி மக்கள் கொல்லப்பட்டனர்.

யேமன் மீது அமெரிக்கா மேற்கொண்ட வான்வழித் தாக்குதல்கள் சர்வதேச சட்டத்தின் கீழ் ஏராளமான சட்டங்கள் மற்றும் உடன்படிக்கைகளை மீறியதால், தாக்குதலை திட்டமிட்டவர்கள், நடத்தியவர்கள் மற்றும் செயல்படுத்தியவர்கள் பின்வரும் போர்க்குற்றங்களுக்கு குற்றவாளிகளாகக் கருதப்பட்டனர்:

• ஐக்கிய நாடுகள் சபையின் சாசனம் மற்றும் ரோம் சட்டத்தின் கீழ் பலத்தைப் பயன்படுத்துவதற்கான தடையை மீறி, தூண்டுதலற்ற தாக்குதலை நடத்துதல்.
• ஐக்கிய நாடுகள் சபையின் சாசனம், சிவில் மற்றும் அரசியல் உரிமைகள் தொடர்பான சர்வதேச உடன்படிக்கை (ICCPR) மற்றும் ரோம் சட்டத்தின் பாதுகாப்புகளை மீறும் வகையில், போரில் ஈடுபடாத அரசியல் தலைவர்களைக் குறிவைத்து கொலை செய்தல்.
• ஜெனீவா ஒப்பந்தங்கள் மற்றும் ரோம் சட்டங்களில் கோடிட்டுக் காட்டப்பட்டுள்ள கண்மூடித்தனமான தாக்குதல்கள் மீதான தடையை மீறும் வகையில், இராணுவம் மற்றும் பொதுமக்கள் இலக்குகளை வேறுபடுத்திப் பார்க்கத் தவறும் ஆயுதங்கள் அல்லது தந்திரோபாயங்களைப் பயன்படுத்துதல்.

அமெரிக்க இராணுவம் யேமன் மீது தாக்குதல் நடத்திய பத்து நாட்களுக்குப் பிறகு, கடந்த திங்கட்கிழமை, ட்ரம்ப் நிர்வாகத்தின் முன்னணி அதிகாரிகள், யேமன் மீதான தாக்குதலுக்கான சதித் திட்டமிடலுக்கு அட்லாண்டிக் இதழின் தலைமை பதிப்பாசிரியர் ஜெஃப்ரி கோல்ட்பெர்க்கையும் தற்செயலாகச் சேர்த்திருந்தனர் என்ற உண்மையை அம்பலப்படுத்தி அட்லாண்டிக் இதழ் ஒரு அறிக்கையை வெளியிட்டது.

கோல்ட்பெர்க், ஒரு சட்டவிரோத ஆக்கிரமிப்பு போரைத் தொடங்குவதற்கான ஒரு குற்றவியல் சதித்திட்டத்தில் தான் அந்தரங்கமாக இருப்பதைக் கண்டார். கடமை உணர்வுடன் செய்தி இழையில் இருந்து தன்னைத்தானே விலக்கிக் கொண்டு, சதிகாரர்களின் தவறை அவர்களுக்கு தெரிவித்து, பின்னர் கலந்துரையாடலிருந்து தேர்ந்தெடுக்கப்பட்ட பகுதிகளை வெளியிடுவதற்கு பத்து நாட்கள் காத்திருந்தார்.

இந்த போர்த் திட்டங்களில் தற்செயலாக கோல்ட்பேர்க் சேர்க்கப்பட்டமை ஜனநாயகக் கட்சி மற்றும் ஊடகங்களிடம் இருந்து சீற்றத்தைத் தூண்டியது. இந்த சீற்றமானது, குற்றகரமான ஆக்கிரமிப்பு போர் மீதோ அல்லது திட்டமிடப்பட்டு வந்த போர் குற்றங்கள் மீதோ அல்ல, மாறாக அந்தக் கலந்துரையாடல்கள் பாதுகாப்பான இராணுவ பாதைகளுக்கு வெளியே நடந்தது என்பதால்தான் ஆகும்.

பாதுகாப்பு செயலாளர் பீட் ஹெக்செத்தின் நடவடிக்கைகள் “மனசாட்சியை அதிர்ச்சிக்குள்ளாக்கியதாகவும்”, பொதுமக்களைக் கொன்றதற்காக அல்ல, மாறாக கவனக்குறைவாக இந்தக் குற்றங்களை பொதுமக்களுக்கு வெளிப்படுத்தியதற்காக “சட்டத்தை மீறியதாகவும்” கூறி, பிரதிநிதிகள் சபையின் ஜனநாயகக் கட்சித் தலைவர் ஹக்கீம் ஜெஃப்ரிஸ், அவரை பதவி விலகுமாறு அழைப்பு விடுத்தார்.

ஆனால், பொதுமக்களுக்கு ஆர்வமூட்டுவது என்னவென்றால் இந்த சதித்திட்டம் கலந்துரையாடப்பட்ட வழியல்ல, மாறாக அதன் உள்ளடக்கம்தான். இந்த கசியவிடப்பட்ட கலந்துரையாடல், அமெரிக்க ஆக்கிரமிப்புப் போர்கள் எவ்வாறு தயாரிக்கப்படுகின்றன, தொடக்கப்படுகின்றன மற்றும் மோசடியாக நியாயப்படுத்தப்படுகின்றன என்பதற்கான ஒரு வெளிப்படையான பார்வையை வழங்குகிறது. ட்ரம்ப் அதிகாரிகள் வேறுபட்ட தகவல் தொடர்பு தளத்தைப் பயன்படுத்தியிருக்கலாம் என்றாலும், முந்தைய நிர்வாகங்களால் தொடங்கப்பட்ட எண்ணற்ற போர்களுக்குப் பின்னால் உள்ள திட்டமிடல் மற்றும் ஏமாற்றுதலை இதன் உள்ளடக்கம் பிரதிபலிக்கிறது.

யேமனுக்கு எதிராக ஒரு புதிய தாக்குதலை தொடங்குவதற்கான நேரம் மற்றும் அறிவுறுத்தல் குறித்து ட்ரம்ப் நிர்வாகத்தின் மூத்த உறுப்பினர்களிடையே நடந்த கலந்துரையாடலை சிக்னல் செயலியில் உள்ள நூல் ஆவணப்படுத்தியது. துணை ஜனாதிபதி ஜே.டி. வான்ஸ் தாக்குதலை தாமதப்படுத்த வாதிட்டாலும், தனது பாசிச சிந்தனை கொண்ட ஆலோசகர் ஸ்டீபன் மில்லர் மூலம் குழுவுடன் தொடர்பு கொண்ட ட்ரம்ப், இறுதியில் உடனடியாக தாக்குதல்களைத் தொடங்க முடிவு செய்தார்.

ஒரு சிறிய, ஏழ்மையான பாதுகாப்பற்ற நாட்டின் மீதான தாக்குதல் முற்றிலும் “வேண்டுமென்றே நடத்தப்படும் போர்” என்பதை இந்த கலந்துரையாடல் தெளிவுபடுத்துகிறது. அமெரிக்கா இன்னும் மேலாதிக்கம் செலுத்தும் உலகளாவிய இராணுவ சக்தியாக உள்ளது என்பதை உலகிற்கு சமிக்ஞை செய்யும் நோக்கத்தை இந்த தாக்குதல் கொண்டிருக்கிறது.

பாதுகாப்பு செயலர் பீட் ஹெக்செத் கசிந்த செய்தியில் விளக்கியதைப் போல, “இது தாக்குதலின் அதிகாரப்பூர்வ இலக்கான ஹவுதிகளைப் பற்றியது அல்ல”. மாறாக, இது “கடல் வழி சுதந்திரத்தை மீட்டெடுப்பதையும் தடுப்பை மீண்டும் நிறுவுவதையும் நோக்கமாகக் கொண்டது.”

காஸாவிற்குள் உணவுப் பொருட்கள் நுழைவதை இஸ்ரேல் தடுப்பதை நிறுத்தாவிட்டால், செங்கடல் வழியாக இஸ்ரேலிய கப்பல்கள் செல்வதை யேமனின் ஹவுதி அரசாங்கம் தடுக்கும் என்று அது வெளியிட்ட அறிக்கையே யேமன் மீதான தாக்குதலுக்கான பகிரங்க நியாயப்படுத்தலாக இருந்தது.

மத்திய கிழக்கில் அமெரிக்காவின் பினாமியான இஸ்ரேலை இந்த முறையில் எதிர்ப்பது அமெரிக்க ஏகாதிபத்தியத்திற்கு சவால் விடுப்பதாக கருதப்பட்டது. உலகின் பிற பகுதிகளுக்கு ஒரு செய்தியை அனுப்புவதற்கும், ஹெக்செத்தின் வார்த்தைகளில் கூறுவதானால், “தடுப்புமுறையை மீண்டும் ஸ்தாபிப்பதற்கும்” அது பெரும் வன்முறையை கட்டவிழ்த்துவிட வேண்டியிருந்தது.

அமெரிக்கா ஒரு ஏகாதிபத்திய சக்தியாக எழுந்ததில் இருந்து அமெரிக்காவால் நடத்தப்பட்ட நூற்றுக்கணக்கான போர்கள், இராணுவ நடவடிக்கைகள் மற்றும் ஸ்திரமின்மையை ஏற்படுத்தும் தாக்குதல்கள் ஒவ்வொன்றும் உடனடி அச்சுறுத்தலுக்கான ஒரு பதிலடியாக பொதுமக்களுக்கு நியாயப்படுத்தப்பட்டுள்ளன. அமெரிக்க இராணுவம் நடவடிக்கை எடுக்காவிட்டால், “மக்கள் இறப்பார்கள்” என்று பொதுமக்களுக்கு மீண்டும் மீண்டும் கூறப்பட்டு வருகிறது. ஆனால், யேமன் மீதான தாக்குதல் மீதான கருத்துப் பரிமாற்றம், அதுபோன்றவொரு “உடனடி அச்சுறுத்தல்” எதுவும் இல்லை என்பதைத் தெளிவுபடுத்துகிறது.

இந்தப் பரிமாற்றத்தில், தேசிய பயங்கரவாத எதிர்ப்பு மையத்தின் தலைவராக ட்ரம்பால் பரிந்துரைக்கப்பட்ட ஜோ கென்ட், “கால வரிசையை பாதிக்கும் நேரக் கட்டுப்பாடுகள் எதுவும் இல்லை. ஒரு மாதத்தில் எங்களுக்கும் அதே விருப்பங்கள் இருக்கும்” என்று எழுதினார். “சில வாரங்கள் அல்லது ஒரு மாதம் காத்திருப்பது நிலைமையை அடிப்படையில் மாற்றாது” என்று ஹெக்செத் கூறினார்.

யேமனுக்கு எதிரான ட்ரம்ப் நிர்வாகத்தின் அம்பலப்படுத்தப்பட்ட போர்த் திட்டங்களால் எழுப்பப்பட்ட மிக அழுத்தமான கேள்வி இதுதான்: ட்ரம்ப் நிர்வாகம் தற்போது வேறு என்ன “விருப்பத்தேர்வு போர்களுக்கு” தயாரிப்பு செய்து வருகிறது?

யேமன் மீதான தாக்குதல் குறித்த கலந்துரையாடலில் பங்கெடுத்த பலரும், அமெரிக்க இராணுவ ஆக்ரோஷத்தின் மைய இலக்கு சீனா என்பதை முந்தைய அறிக்கைகளில் தெளிவுபடுத்தியிருந்தனர். ஹெக்செத்தின் வார்த்தைகளில், “எமது... முக்கிய தேசிய நலன்களை அச்சுறுத்தும் திறன் மற்றும் நோக்கம் கொண்ட உலகின் ஒரே நாடு சீனா மட்டுமே.”

இம்மாத தொடக்கத்தில், உலகின் மிகப் பெரிய பணக்காரரும் முன்னணி இராணுவ ஒப்பந்த நிறுவனமான ஸ்பேஸ்எக்ஸ் இன் தலைமை செயலதிகாரியுமான எலோன் மஸ்க், தாக்குதலுக்கான குறிப்பிட்ட இலக்குகள் உட்பட சீனாவுக்கு எதிரான அமெரிக்க போர்த் திட்டங்கள் குறித்த ஒரு இரகசிய விளக்கத்தில் கலந்து கொள்ள பென்டகனுக்கு பயணித்தார். இறுதியில், அது பற்றிய செய்தி பத்திரிகைகளுக்கு கசிந்ததை அடுத்து கூட்டம் இரத்து செய்யப்பட்டதாக கூறப்படுகிறது.

ஆனால், அத்தகைய சந்திப்பு நடத்த திட்டமிடப்பட்டிருந்தது என்ற உண்மையே ஒரு கேள்வியை எழுப்புகிறது: அதாவது, உலகின் மிகப்பெரிய மக்கள்தொகை, பொருளாதாரம் மற்றும் மூன்றாவது மிகப்பெரிய அணுஆயுத தளவாடங்களைக் கொண்ட நாடான சீனாவுடனான போருக்கு ட்ரம்ப் நிர்வாகம் ஒரு கால அட்டவணையைக் கொண்டிருக்கிறதா?

ஜனவரி 2023 இல், விமானப்படையின் விமான இயக்க கட்டளை மையத்தின் தலைவரான நான்கு நட்சத்திர ஜெனரல் மைக் மினிஹான், 2025 க்குள் அமெரிக்கா, சீனா மீதான போரை முன்னறிவிக்கும் உள் குறிப்பை வெளியிட்டார். மேலும் அவர், சீன ஜனாதிபதி ஜி ஜின்பிங்கைக் குறிப்பிட்டு, “ஜின்பிங்கின் குழு, பகுத்தறிவு மற்றும் வாய்ப்பு அனைத்தும் 2025 ஆம் ஆண்டிற்காக சீரமைக்கப்பட்டுள்ளன” என்று அவர் கூறினார். மேலும் துருப்புக்கள் “தங்கள் தனிப்பட்ட விஷயங்களைக் கருத்தில் கொண்டு 7 மீட்டர் இலக்கை” நோக்கிச் சுடுவதன் மூலம் பயிற்சி செய்யுமாறு வலியுறுத்தினார், “மனந்திரும்பாத மரணம் மிக முக்கியமானது. தலையை குறிவைக்கவும்” என்று அவர் எழுதினார்.

யேமன் மீதான தாக்குதல் குறித்த கலந்துரையாடலில், “பொதுமக்கள் இந்த நிகழ்வையோ அல்லது அதன் அவசியத்தையோ புரிந்து கொள்ளவில்லை” என்று துணை ஜனாதிபதி வான்ஸ் ஒரு பெரிய கவலையை எழுப்பினார்:

சீனாவிற்கு எதிரான ட்ரம்ப் நிர்வாகத்தின் போர்த் திட்டமிடலில் இது ஐயத்திற்கிடமின்றி ஒரு மத்திய பிரச்சினையாகும்: உலகின் மறுபக்கத்தில் இருக்கும் ஒரு நாட்டின் மீதான போரை அமெரிக்க மக்கள் எவ்வாறு ஏற்றுக்கொள்ள முடியும், குறைந்தபட்சம், ஏராளமான அமெரிக்க துருப்புக்களின் இறப்பு மற்றும் நூற்றுக்கணக்கான பில்லியன் டாலர்கள் செலவு, மற்றும் மிக மோசமான நிலையில், முக்கிய அமெரிக்க நகரங்களை அணுஆயுத மூலம் அழித்தல் ஆகியவை இதில் அடங்கும்?

Foreign Affairs என்ற இதழில் தற்போது வெளியாகியுள்ள ஒரு கட்டுரை இந்தக் கேள்வியையே எழுப்புகிறது. “அமெரிக்கர்கள் சீனாவிற்கு எதிராகப் போருக்குச் செல்வார்களா?” என்ற தலைப்பின் கீழ், அமெரிக்க வெளியுறவுக் கொள்கையின் முன்னணி சஞ்சிகை, “பெரும்பாலான அமெரிக்கர்கள் உலகத்திலிருந்து பின்வாங்க விரும்புவதாகக் கூறினாலும்”, -அதாவது குறைவான போர்களைத் தொடங்குவது- சீனாவுடனான போர் அமெரிக்கா மீதான தாக்குதலுக்கு ஒரு தற்காப்பு எதிர்வினையாக வடிவமைக்கப்பட்டால் பொதுக் கருத்து மாறக்கூடும் என்று வாதிடுகிறது.

“ஆனால், கடந்த ஜூலை மாதம் சாதாரண அமெரிக்கர்கள் மற்றும் முன்னாள் அமெரிக்க கொள்கை வகுப்பாளர்களிடம் நாங்கள் நடத்திய ஒரு கணக்கெடுப்பில், சீன மக்கள் விடுதலை இராணுவம் தென் சீனக் கடலில் அமெரிக்க கப்பல்களைத் தாக்கினால், சீனாவைத் தாக்குவதற்கு தெளிவான பெரும்பான்மையினர் ஆதரவளிப்பதைக் கண்டறிந்தோம்” என்று அக்கட்டுரை அறிவிக்கிறது.

இந்த வாதம், கொள்கைக்கான பாதுகாப்பு துணைச் செயலாளரான ட்ரம்பின் வேட்பாளர் எல்பிரிட்ஜ் கோல்பியின் (Elbridge Colby) கருத்துக்களுடன் ஒத்துப்போகிறது. மறுப்பின் மூலோபாயம் (The Strategy of Denial) என்ற தனது 2021 புத்தகத்தில், சீனாவுடனான எந்தவொரு போரும் பெய்ஜிங் “முதல் துப்பாக்கிச் சூடு நடத்தியது” போல் தோன்றுவதை அமெரிக்கா உறுதி செய்ய வேண்டும் என்று கோல்பி வாதிட்டார். வாஷிங்டன், “கூட்டணியின் உறுதியை வலுப்படுத்த சீனாவை வேண்டுமென்றே கட்டாயப்படுத்த வேண்டும்” என்று அவர் எழுதினார் - அதாவது, பொதுமக்களுக்கும் அமெரிக்க நட்பு நாடுகளுக்கும் போரை நியாயப்படுத்தப் பயன்படுத்தக்கூடிய ஒரு பதிலைத் தூண்ட வேண்டும்” என்று அவர் எழுதினார்.

கோல்பி பின்வருமாறு அறிவிக்கிறார்:

சீனா இந்த வழியில் பார்க்கப்படுவதை உறுதி செய்வதற்கான மிகத் தெளிவான மற்றும் சில நேரங்களில் மிக முக்கியமான வழி, முதலில் தாக்குவது அதுதான் என்பதை உறுதி செய்வதாகும். தாக்குதலைத் தொடங்கியவர் ஆக்கிரமிப்பாளர் என்றும், எனவே, முதல் பார்வையில், தார்மீகப் பொறுப்பில் அதிக பங்கைக் கொண்டவர் என்றும் கூறும் ஒரு சில மனித தார்மீக உள்ளுணர்வுகள் மட்டுமே ஆழமாக வேரூன்றியுள்ளன.

இதனை வேறு வார்த்தைகளில் கூறுவதானால், சீனாவிற்கு எதிரான போருக்கு அமெரிக்கா வெற்றிகரமாக பொதுமக்களின் ஆதரவைத் திரட்ட கியூபா, போர்டோ ரிக்கோ மற்றும் பிலிப்பைன்ஸைக் கைப்பற்றுவதை நியாயப்படுத்தப் பயன்படுத்தப்படும் 1898 யுஎஸ்எஸ் மைனே (USS Maine) போர்க்கப்பல் மூழ்கடிக்கப்பட்டதை, அல்லது வியட்நாம் போரில் நேரடியாக அமெரிக்க தலையீட்டை நியாயப்படுத்தப் பயன்படுத்தப்படும் டோன்கின் (Tonkin) வளைகுடா சம்பவத்தின் 21 ஆம் நூற்றாண்டின் பதிப்பை அரங்கேற்ற வேண்டியிருக்கும்.

யேமன் மீதான தாக்குதல் குறித்த கசிந்த கலந்துரையாடல்கள் ஒரு எச்சரிக்கையாக பார்க்கப்பட வேண்டும். அரசியல், பொருளாதார மற்றும் சமூக நெருக்கடியால் சூழப்பட்டுள்ள ஒரு சூறையாடும் மற்றும் குற்றகரமான நிதியியல் தன்னலக்குழுவின் தலைமையில் உள்ள, அதிகரித்து வரும் உள்நாட்டு எதிர்ப்பை எதிர்கொண்டுள்ள ட்ரம்ப் நிர்வாகம், ஒரு முழு அளவிலான உலகளாவிய ஆக்ரோஷ போரைத் தொடங்குவது உட்பட எந்தவொரு குற்றத்தையும் செய்யும் தகைமையைக் கொண்டுள்ளது.