இந்த மொழிபெயர்ப்பின் மூலக் கட்டுரையை இங்கு காணலாம்.

அமெரிக்க ஜனாதிபதி டொனால்ட் ட்ரம்ப் செவ்வாய்க்கிழமை ஐக்கிய நாடுகள் பொதுச் சபையில், ஈரானின் “இஸ்லாமிய குடியரசை அழித்தொழிப்பதா” என்றும், “உயிர் தப்பும் வாய்ப்பே இல்லாமல் அவர்களை நரகத்திற்குள் தள்ளுவதா” என்றும் தான் தீர்மானித்துக் கொண்டிருப்பதாகக் கூறினார்.

“மக்களையும் நாடுகளையும் மீண்டும் கொன்று அழிப்பதற்கு அவர்களுக்கு எந்த வாய்ப்பும் கொடுக்காமல், இஸ்லாமிய குடியரசை விரைவாக அழித்தொழித்துவிடவா?” என்று அமெரிக்க ஜனாதிபதி கேள்வி எழுப்பினார்.

உலகளாவிய போர் வெடித்தெழும் சூழலில், ட்ரம்பின் இந்தக் கொலைவெறி நிறைந்த மொழி ஏகாதிபத்திய வெளியுறவுக் கொள்கையின் குற்றமயமாக்கல் ஒரு புதிய கட்டத்தை எட்டியிருப்பதைக் குறிக்கிறது. சோவியத் ஒன்றியத்திற்கு எதிராக அழித்தொழிப்புப் போரை (Vernichtungskrieg) நடத்திய அடால்ஃப் ஹிட்லரின் ஆட்சியின் சொல்லாடலைத் தவிர, நவீன அரசியலில் இதற்கு முன்னுதாரணம் எதுவும் இல்லை.

ஆனால் ட்ரம்பைப் போலல்லாமல், ஹிட்லர் தனது அழித்தொழிப்புப் போரைப் பொதுவெளியில் அறிவிக்கவில்லை. அந்த உத்தரவை அவர் தனிப்பட்ட முறையில் தனது இராணுவத்  தளபதிகளுக்கே வழங்கினார். 1941ஆம் ஆண்டு மார்ச் 30ஆம் தேதி, சுமார் 200 உயர்மட்ட இராணுவ அதிகாரிகளுடன் நடைபெற்ற ஒரு மூடிய கூட்டத்தில், வரவிருக்கும் படையெடுப்பு ஒரு Vernichtungskampf, அதாவது “அழித்தொழிப்புப் போராக” இருக்கும் என்று அவர் தெரிவித்தார். இந்த விவரம் அவரது இராணுவத் தலைமைப் பணியாளர் ஃபிரான்ஸ் ஹால்டரின் நாட்குறிப்பில் பதிவு செய்யப்பட்டுள்ளது.

போரின் மூலம் அந்த நாட்டைக் கீழ்ப்படுத்துவதற்கான ட்ரம்பின் முயற்சிகளை எதிர்த்து வந்துள்ள ஈரான் மக்களை அழித்தொழிப்பது குறித்து, வெள்ளை மாளிகையில் உண்மையிலேயே தீவிரமாக விவாதிக்கப்பட்டு வருகிறது. 93 மில்லியன் மக்களைக் கொண்ட நாடான ஈரானுக்கு எதிராக அணு ஆயுதங்களைப் பயன்படுத்தும் விஷயத்தை, தனது மூத்த பணியாளர்களுடன் நடைபெற்ற ஒரு இரகசியக் கூட்டத்தில் ட்ரம்ப் விவாதத்திற்கு எடுத்துவந்ததாக, பத்திரிகையாளர் சேமூர் ஹெர்ஷ் ஜூன் 10ஆம் தேதி தெரிவித்தார்.

ஈரானுக்கு எதிராக ட்ரம்ப் தொடுத்த குற்றவியல் ஆக்கிரமிப்புப் போரில், ஜூன் 10 நிலவரப்படி குறைந்தது 3,468 பேர் கொல்லப்பட்டதுடன், 26,500க்கும் மேற்பட்டோர் காயமடைந்ததாக ஈரான் சுகாதார அமைச்சகம் தெரிவித்தது. கடந்த வாரம், ஐக்கிய நாடுகளின் உண்மை கண்டறியும் தூதுக்குழு ஒன்று, “அமெரிக்கா போர்க் குற்றங்களைச் செய்துள்ளது என்று நம்புவதற்கான நியாயமான காரணங்கள் உள்ளன” என்று கண்டறிந்தது. இதற்கான உதாரணமாக, பிப்ரவரி 28ஆம் தேதி மினாபில் உள்ள ஒரு தொடக்கப் பள்ளியின் மீது அமெரிக்கா நடத்திய ஏவுகணைத் தாக்குதலை அக்குழு சுட்டிக்காட்டியது; அந்தத் தாக்குதலில் 150க்கும் மேற்பட்டோர் கொல்லப்பட்டனர், அவர்களில் 120 பேர் குழந்தைகள்.

ஈரானுக்கு எதிரான போர், மத்திய கிழக்கு முழுவதும் நடைபெறும் அமெரிக்க-இஸ்ரேலிய தாக்குதலின் ஒரு கூறாகும்; அதன் மிக உயர்ந்த வெளிப்பாடு காஸாவில் நடைபெற்று வரும் இனப்படுகொலையாகும், இது காஸா சுகாதார அமைச்சகத்தின்படி இதுவரை 73,919 பாலஸ்தீனியர்களின் உயிரைப் பறித்துள்ளது.

ஈரானுக்கு எதிரான அச்சுறுத்தல் ஒரு தொடரின் ஒரு அம்சம் மட்டுமே. வெனிசுலாவின் தலைநகருக்குள் ஆழமாக அமெரிக்க இராணுவம் ஊடுருவிச் சென்று, மதுரோவை “கைது” செய்ததாக ட்ரம்ப் பெருமை பேசினார். அதற்கான வெகுமதியாக, 65 பில்லியன் பீப்பாய் எண்ணெயை உள்ளடக்கிய “வரலாற்றிலேயே மிகப் பெரிய எண்ணெய் ஒப்பந்தம்” கிடைத்ததாகவும் அவர் கூறினார். “வெற்றியாளருக்கே கொள்ளைப் பொருள் உரியது” என்று ட்ரம்ப் பிரகடனப்படுத்தினார். கியூபா “முற்றிலும் தோல்வியடைந்த ஒரு நாடாக உள்ளது … அது வீழ்ச்சியடையும்” என்றும் அவர் தெரிவித்தார். கிரீன்லாந்து அமெரிக்காவின் “நிரந்தரக் கட்டுப்பாட்டின்” கீழ் வரவுள்ளது; அங்கு இரண்டு “மிக முக்கியமான இராணுவத் தளங்களும்” அமைக்கப்பட உள்ளன.

ட்ரம்பின் உரையின்போது, ஈரான் மற்றும் கியூபா ஆகிய நாடுகளின் பிரதிநிதிகள் மட்டுமே எதிர்ப்புத் தெரிவித்து அரங்கை விட்டு வெளியேறினர்; கியூபாவின் அரசாங்கத்தைத் தூக்கியெறிவதாக ட்ரம்ப் அச்சுறுத்தியிருந்தார். ஜனநாயகம் மற்றும் மனித உரிமைகள் குறித்து இடையறாது போதித்துக் கொண்டிருக்கும் ஐரோப்பிய ஏகாதிபத்திய சக்திகளின் பிரதிநிதிகளோ, அங்கேயே அமர்ந்திருந்தபடி எதுவும் செய்யவில்லை. பொதுச் சபைக்குத் தலைமை தாங்கும் பங்களாதேஷ் வெளியுறவு அமைச்சர் கலிலுர் ரஹ்மான், அமெரிக்க அதிபருக்கு நன்றி தெரிவித்தார்.

1945ஆம் ஆண்டு ஜூன் 26ஆம் தேதி, நாஜி ஜேர்மனி சரணடைந்த ஏழு வாரங்களுக்குப் பிறகு, ஐக்கிய நாடுகள் சாசனம் சான் பிரான்சிஸ்கோவில் கையொப்பமிடப்பட்டது. “நமது வாழ்நாளில் இருமுறை மனிதகுலத்திற்குச் சொல்லொணா துயரத்தை வருவித்த போரின் வேதனையிலிருந்து வரும் தலைமுறையினரைக் காப்பாற்றுவதற்காக” இது கையொப்பமிடப்பட்டது.

அதன் இரண்டாம் பிரிவு, “எந்த ஒரு நாட்டின் பிரதேச ஒருமைப்பாட்டிற்கோ அரசியல் சுதந்திரத்திற்கோ எதிராக பலப்பிரயோகம் செய்வதையோ அதற்கு அச்சுறுத்துவதையோ தமது சர்வதேச உறவுகளில் தவிர்க்க வேண்டும்” என ஒவ்வொரு உறுப்பு நாட்டையும் கட்டுப்படுத்துகிறது. ட்ரம்பின் உரை அத்தகைய ஓர் அச்சுறுத்தலாகவே அமைந்தது; ஏறத்தாழ ஏழு மாதங்களாகத் தொடரும் சட்டவிரோத ஆக்கிரமிப்புப் போரை நடத்தும் ஒரு நாட்டின் தலைவரால், இத்தகைய அச்சுறுத்தல்களைச் சட்டத்திற்குப் புறம்பாக்குவதற்காகவே கட்டப்பட்ட அதே கட்டிடத்தில் அது வழங்கப்பட்டது. ட்ரம்பின் உரையே சர்வதேச சட்டத்தை மீறியதாகக் குற்றம்சாட்டப்படக்கூடியது.

செவ்வாய்க்கிழமையன்று பிரெஞ்சு ஜனாதிபதி இம்மானுவேல் மக்ரோன், ட்ரம்பிற்கு எதிரான ஐரோப்பிய நிலைப்பாட்டை வெளிப்படுத்தினார். அவர், “ஏகாதிபத்தியத்தின் மீள்வரவு, அகங்காரத்தின் மீள்வரவு, எந்த விதிமுறையையும் அறியாத கட்டுப்பாடற்ற பலத்தின் மீள்வரவு … தங்கள் எல்லைகளை விரிவுபடுத்துவதற்காக சர்வதேச ஒழுங்கைக் குலைக்க முடியும் என்று சிலர் நம்பும் ஒரு உலகம்” ஆகியவற்றைக் குறித்துப் பேசினார்.

“போர்க் குற்றங்கள் தொழில்மயமாக்கப்பட்டுவிட்டன. பொதுமக்களின் உள்கட்டமைப்புகள் அழிக்கப்படுவதையும், மனித உரிமை மீறல்களையும் நாம் கண்டுள்ளோம்” என்று அவர் மேலும் கூறினார்.

எனினும், சில விமர்சகர்கள் அவரது கருத்துகளை ட்ரம்புக்கு எதிரான மறைமுகமான விமர்சனமாகக் கருதினாலும், மக்ரோன் அமெரிக்க அதிபரின் பெயரைக் குறிப்பிடவே இல்லை. மாறாக, அவரது உரை ரஷ்யாவுக்கு எதிரான உரத்த, வெளிப்படையான கண்டனமாகவும், ட்ரம்புடன் இணைந்து உக்ரேனுக்கு நிதியுதவியும் ஆயுத உதவியும் தொடர்வதற்கான தனது நோக்கத்தை அறிவிக்கும் பிரகடனமாகவும் அமைந்தது.

“ரஷ்யா பொதுமக்களுக்கு எதிராக ஒரு கொடூரமான போரை நடத்தி வருகிறது. அது ஒரு இறையாண்மை கொண்ட நாட்டின் பிரதேசத்தை ஆக்கிரமித்து வருகிறது. ரஷ்யாவுக்கு எதிரான தனது போரில் உக்ரேனுக்குப் பிரான்ஸ் தொடர்ந்து தாராளமான ஆதரவை வழங்கும்” என்று மக்ரோன் அறிவித்தார்.

மக்ரோனின் பார்வையில், ரஷ்யாவின் “ஏகாதிபத்தியத்திற்கும்” “போர்க் குற்றங்களுக்கும்” பொருத்தமான பதில், ஐரோப்பிய ஏகாதிபத்திய சக்திகள் ரஷ்யாவுக்கு எதிரான தமது போரைத் தீவிரப்படுத்துவதே ஆகும். ரஷ்யாவுக்கு எதிரான போர் ஜனநாயகத்திற்கான போர் என்ற தனது கூற்றுகளை, அந்தப் போரில் தனது கூட்டாளியான ட்ரம்ப் ஒரு முழு நாட்டு மக்களையும் அழித்தொழிக்கப் போவதாக அப்போதுதான் அச்சுறுத்தியிருந்த உண்மையுடன் இணக்கப்படுத்திக் காட்ட மக்ரோன் எந்த முயற்சியும் எடுக்கவில்லை.

1920ஆம் ஆண்டில் லெனின், ஐக்கிய நாடுகளின் முன்னோடியான சர்வதேச சங்கத்தை, “ஒருவரிடமிருந்து மற்றொருவர் எலும்புகளைப் பறித்துக்கொள்ளத் துடிக்கும் வெறிநாய்களின் கூட்டம்” என்று வர்ணித்தார். இந்தச் சொற்றொடர் இன்று சற்றுப் பழைய பாணியிலானதாகத் தோன்றலாம். ஆனால் 2026ஆம் ஆண்டின் ஐக்கிய நாடுகள் பொதுச் சபையோ போருக்கான ஒரு தீவிரமான திட்டமிடல் மையமாக உள்ளது.

அதே நாளில் உக்ரேன் ஜனாதிபதி வொலோடிமீர் ஜெலென்ஸ்கியைச் சந்தித்த பிறகு, உக்ரேனுக்கு ரேடார்களையும் வான் தற்காப்பு ஏவுகணைகளையும் வழங்கும் ஒப்பந்தத்தை மக்ரோன் அறிவித்ததாக கீவ் இண்டிபெண்டன்ட் செவ்வாய்க்கிழமை தெரிவித்தது. ட்ரம்பும் தன் பங்கிற்கு செவ்வாய்க்கிழமை ஜெலென்ஸ்கியைச் சந்தித்து, உக்ரேனில் பேட்ரியட் வான் தற்காப்பு ஏவுகணைகளின் உற்பத்தி குறித்து விவாதிக்கப்பட்டு வருவதை உறுதிப்படுத்தினார்.

ட்ரம்ப்-ஜெலென்ஸ்கி சந்திப்பு தொடங்கியபோது, ஒரு பிரிட்டிஷ் நிருபர் ட்ரம்பிடம், “எங்களுக்கும் ரஷ்யாவுக்கும் இடையிலான நேரடி மோதல் தவிர்க்க முடியாதது என்பது குறித்து பிரிட்டனிலும் மற்ற ஐரோப்பிய தலைவர்களிடமிருந்தும் வெளிவரும் அச்சுறுத்தும் தொனி குறித்து பிரிட்டனில் பலரும் மிகவும் கவலைப்படுகின்றனர்” என்று கூறி, “அது நிகழாமல் தடுக்க முடியுமா?” என்று கேட்டார். ட்ரம்ப் தீவிரமான பதிலை அளிக்க மறுத்தார்.

உண்மையில், ஈரானுக்கு எதிரான ட்ரம்பின் மயிர்க்கூச்செறியும் அச்சுறுத்தல்களும், அவை ஏகாதிபத்திய சக்திகளின் தலைவர்களிடையே எந்தத் தீவிரமான எதிர்ப்பையும் தூண்டவில்லை என்ற உண்மையும், உலகளாவிய போரும் அதன் இயல்பான விளைவான முழு மக்கள்தொகைகளின் அழித்தொழிப்பும் உலக முதலாளித்துவத்தால் எந்த அளவுக்கு இயல்பாக்கப்பட்டுள்ளன என்பதை வெளிப்படுத்துகின்றன.

ஜனநாயகக் கட்சியினர் இந்தப் போர்வெறிக்கு ஒரு மாற்றாக இல்லை. அதற்குச் சில நாட்களுக்கு முன்பே, ரஷ்யாவுக்கு எதிராக மட்டுமின்றி ஈரானுக்கு எதிராகவும் போரைத் தீவிரப்படுத்த ட்ரம்புக்கு அவர்கள் ஒரு வெற்றுக் காசோலையை வழங்கியிருந்தனர். செப்டம்பர் 16ஆம் தேதி, பிரதிநிதிகள் சபையின் 58 ஜனநாயகக் கட்சி உறுப்பினர்கள் லிண்ட்சே ஓ. கிரகாம் ரஷ்யா மற்றும் ஈரானுக்குத் தடை விதிக்கும் சட்டத்திற்கு ஆதரவாக வாக்களித்தனர்; இது சீனா, இந்தியா உள்ளிட்ட ரஷ்ய எண்ணெயின் மிகப்பெரிய கொள்முதலாளர் நாடுகளிலிருந்து இறக்குமதி செய்யப்படும் பொருட்களுக்கு 100 சதவீதம் வரை வரி விதிக்க ஜனாதிபதிக்கு அதிகாரம் அளிக்கிறது; மேலும் ஈரானின் எரிசக்தி மற்றும் ஆயுதத் துறைகள் மீதான தடைகளை ஐந்து ஆண்டுகளுக்கு நீட்டிக்கிறது. செனட்டின் 45 ஜனநாயகக் கட்சி உறுப்பினர்களில் 36 பேர் ஆகஸ்ட் 7ஆம் தேதி அதற்கு ஆதரவாக வாக்களித்திருந்தனர்.

பிரதிநிதிகள் சபை சிறுபான்மைத் தலைவர் ஹக்கீம் ஜெஃப்ரீஸ், அந்த மசோதா ரஷ்யாவுக்கு எதிராகப் போதுமான அளவு கடுமையாக இல்லை என்று கூறி எதிராக வாக்களித்தார்: “மிரட்டுபவரை எதிர்கொள்ள வேண்டுமே தவிர, அவரைச் சமாதானப்படுத்தக் கூடாது.” நவம்பர் 3ஆம் தேதிக்குப் பிறகு காங்கிரஸில் ஜனநாயகக் கட்சிக்குப் பெரும்பான்மை கிடைத்தால், போரை மேலும் தீவிரமாகவும் விரைவாகவும் கொண்டு செல்லும்.

தனது உரைக்கு முந்தைய நாள், அமெரிக்க ஜனநாயக சோசலிஸ்டுகள் (DSA) அமைப்பின் உறுப்பினரான நியூயார்க் மேயர் சொஹ்ரான் மம்தானியை, கிரேசி மாளிகையில் ட்ரம்ப் சந்தித்தார். மம்தானி போர் குறித்து எதுவும் கூறவில்லை; நிருபர்களிடம் “நகரம் மீதான ஜனாதிபதியின் அர்ப்பணிப்பை நாங்கள் பாராட்டுகிறோம்” என்று கூறினார்.

ட்ரம்ப் தனது உரையை “அமெரிக்காவின் பொற்காலம்” குறித்து வீராப்பு பேசியே தொடங்கினார்; “புதிதாக மறுசக்தியூட்டப்பட்ட, மிகவும் சக்திவாய்ந்த அமெரிக்க ஐக்கிய நாடுகளின் செல்வம், வலிமை, உணர்வு, வேகம் ஆகியவற்றால் முழு உலகமும் உயர்த்தப்பட்டு வருகிறது” என்று அவர் அறிவித்தார்.

உண்மையில், ட்ரம்ப் தலைமை தாங்கி வருவது, அதன் கால்களிலேயே அழுகிக்கொண்டிருக்கும் ஒரு சமூக ஒழுங்கையும் அரசியல் அமைப்பையும் தான்; அதாவது, இரண்டாம் உலகப் போருக்கு முன்னதாக ட்ரொட்ஸ்கி “முதலாளித்துவத்தின் மரணவேதனை” என்று வர்ணித்தது இதுவே. அதே நெருக்கடி அதற்கு நேர்மாறானதையும் உருவாக்கி வருகிறது: சமூக எதிர்ப்பின் வளர்ச்சி, வெகுஜனப் போராட்டங்கள், உலகளாவிய வர்க்கப் போராட்டம்.

ட்ரம்பின் குற்றவியல் போர்வெறிக்கு எதிரான எதிர்ப்பு, ஐரோப்பிய ஏகாதிபத்திய சக்திகளிடமிருந்தோ, ஜனநாயகக் கட்சியினரிடமிருந்தோ, DSA-வில் உள்ள அவர்களது உடந்தையாளர்களிடமிருந்தோ வராது. அது, சர்வதேச சோசலிசத்தின் வேலைத்திட்டத்தை ஆயுதமாகக் கொண்ட சர்வதேச தொழிலாள வர்க்கத்திடமிருந்தே வரும்.