[මෙය 2022 ජනවාරි 17 වැනි දින US and NATO escalation of conflict with Russia is leading to war මැයෙන් පල වූ ලිපියේ පරිවර්තනයයි.]
එක්සත් ජනපදය හා එහි යුරෝපීය සහචරයෝ යුක්‍රේනය කඩතුරාවක් ලෙස යොදා ගනිමින්, රුසියාව සමග ඔවුන්ගේ ගැටුම හිතාමතාම සහ අන්තරාය ගැන නොතකමින් තීව්‍ර කරමින් සිටිති. ඔවුන් පවසන සහ කරන සෑම දෙයකින්ම ප්‍රකාශිත හෝ අප්‍රකාශිත ඉලක්කය අවසානයේදී යුද්ධය කරා ගමන් කරයි.
කොයි මොහොතක හෝ පුපුරා යා හැකි යුද්ධයක් පිලිබඳ සියලු කතා වොෂින්ටනය, යුරෝපීය අගනුවරවල සහ අත්ලාන්තික් සාගරයේ දෙපැත්තේ ඇති අධිරාජ්‍ය ගැති දූෂිත මාධ්‍ය වලින් නිකුත් වේ. රුසියාව ආක්‍රමනය කිරීමට සැරසෙන බවට කරන ප්‍රකාශයන්, මොස්කව් 'ව්‍යාජ ධජ' මෙහෙයුමක් (“false-flag” operation - 'ව්‍යාජ ධජ' මෙහෙයුමක් යනු වගකීමේ සත්‍ය මූලාශ්‍රය වසන් කර වෙනත් පාර්ශවයකට වරද පැටවීමේ චේතනාවෙන් කරන ලද ක්‍රියාවකි) ක්‍රියාත්මක කිරීමට සැලසුම් කරමින් සිටින බවට, කිසිඳු සාක්ෂියක් ඉදිරිපත් නොකරන, දරුනු අනතුරු ඇඟවීම් මගින් ඌනපූරනය කරනු ලැබේ.
වත්මන් තතු තුල, රට තුල ක්‍රියාත්මක වෙමින් පවතින එක්සත් ජනපද මිලිටරි උපදේශකයින් විසින් පුහුනු කරන ලද යුක්‍රේන විශේෂ බලකායේ නිශ්චිතවම එවැනි මෙහෙයුමක් සඳහා ආවරනයක් ලෙස මෙම වාචාල ප්‍රකාශය හුවා දක්වන බව පැහැදිලිය.
පසුගිය දශක තුන පුරා එක්සත් ජනපදය විසින් දියත් කරන ලද සියලුම යුද්ධ වලදී මෙන්, මාධ්‍ය විසින් සත්‍යාපනය නොකල චෝදනා සහ ඉතා පැහැදිලි මුසාවන් සත්‍ය ලෙස ඉදිරිපත් කරයි. නැවත වරක්, නිව් යෝර්ක් ටයිම්ස් සහ වොෂින්ටන් පෝස්ට් වැරදි තොරතුරු ව්‍යාපාරයට නායකත්වය දෙමින් සිටින අතර, එහි අරමුන වන්නේ මහජන මතය ව්‍යාකූල කිරීම සහ දූෂනය කිරීමයි.
2003 දී, ඔවුන් සදාම් හුසේන්ගේ “ඇලුමිනියම් ටියුබ්” සහ මහා විනාශකාරී ආයුධ පිලිබඳ බොරු ප්‍රවර්ධනය කරන විට කලාක් මෙන්, ටයිම්ස් සහ පෝස්ට් “සාක්ෂි” ලෙස උපුටා දක්වන්නේ නාඳුනන පුද්ගලයින් විසින් මුලින් සමාජ මාධ්‍ය ආයතන වන ‘ටික්ටොක්’ සහ ‘ට්විටර්’ හි පල කරන ලද චන්ද්‍රිකා සහ වීඩියෝ ඡායාරූපයන් ය. ඒවා, රුසියාව තුල, ඈත පෙරදිගින් බටහිර දිශාවට හමුදා උපකරන චලනය වීම පෙන්නුම් කරයි.
ආසන්න රුසියානු ආක්‍රමනයක් පිලිබඳ තව දුරටත් 'සාක්ෂි' නම් 1) බයිකාල් විල අසල ප්‍රවාහනය සඳහා පටවනු ලබන හමුදා වාහනවල බර නිසා හිමේ නිර්මානය වූවා යැයි කියනු ලබන ටයර් සලකුනු; 2) 'සඳහන් නොකරන ස්ථානයක, ඉස්කැන්ඩර්-එම් මිසයිල දියත් කරන වාහන ඉටිරෙදි වලින් ආවරනය කර තිබීම;' සහ 3) ප්‍රයිමෝර්ස්කි ක්‍රායි හි නැවතුම්පොලක් අසල නවතා ඇති බව කියන දුම්රියක 'හමුදා වාහන ලෙස පෙනෙන දේවල් පටවා තිබීම' ආදි දේ පෙන්නුම් කරනවා යැයි කියන අර්ථ විරහිත ඡායාරූප ය. මේ කිසිවක් වැදගැම්මකට ඇති දේ නොවේ.
යථාර්ථය ඔලුවෙන් සිටුවමින් වොෂින්ටන් පෝස්ට් පුවත්පත ඊයේ (ජනවාරි 16) ප්‍රකාශයට පත් කරන ලද කතුවැකියක මෙසේ ප්‍රකාශ කලේය: “මෙම සමස්ත අර්බුදයම නිර්මානය කර ඇත්තේ පුටින් මහතා විසිනි. ... ආරක්ෂක හමුදා ක්‍රියාමාර්ගයක පදනම් ගිවිසුමට පමනක් අවසර දී ඇති නේටෝවේ ව්‍යාප්තිය සමඟ එයට කිසිදු සම්බන්ධයක් නැත.'
රුසියාව යුක්‍රේනය ආක්‍රමනය කිරීමට සැරසෙන බව සත්‍යයක් වුව ද, 1991 දී සෝවියට් සංගමය විසුරුවා හැරීමේ සිට සැතපුම් 800 ක් නැගෙනහිරට සිය දේශසීමා දිගු කර ඇති “නේටෝවට', එවැනි මිලිටරි ක්‍රියාවක් 'ව්‍යාප්ත කිරීම සමග කිසිඳු සම්බන්ධයක් නැත” යන්න සෘජු මුහුනුවරකින් ප්‍රකාශ කල හැක්කේ කෙසේද? යුක්‍රේනය සිය මිලිටරි සන්ධානයට ගෙන ඒමේ නේටෝවේ පැහැදිලි අභිප්‍රාය ගැන රුසියාව කනස්සල්ලට පත් නොවී සිටින්නේ කෙසේද? තවද, යුක්‍රේනයේ ප්‍රශ්නය පුටින් විසින් ඔහුගේ අහංකාරෝන්මාදය වසා ගැනීමට භාවිතා කරන හුදු කඩතුරාවක් නම්, එක්සත් ජනපදය සහ නේටෝව යුක්‍රේනයේ අනාගත ඈඳාගැනීමක් බැහැර නොකරන බව අවධාරනය කරන්නේ ඇයි?
නේටෝවේ “ආරම්භක ගිවිසුම අවසර දෙන්නේ ආරක්ෂක මිලිටරි ක්‍රියාමාර්ගවලට පමනක්” බවට පෝස්ට් හි භක්තිමත් සහතිකය සම්බන්ධයෙන් ගත් කල, පසුගිය වසර 30 පුරාවට නේටෝව ආක්‍රමනශීලී අධිරාජ්‍යවාදී මෙහෙයුම්වල කේන්ද්‍රස්ථානය වූ බව එහි කතුවැකි රචකයන්ට අමතක වී ඇති බව පෙනේ. 1990-91 ඉරාකය ආක්‍රමනයට සහභාගී වීම, 1992 දී බොස්නියාවට මැදිහත් වීම, 1999 සර්බියාවට බෝම්බ හෙලීම, 2001 ඇෆ්ගනිස්ථානයට එරෙහි යුද්ධය, 2009 සෝමාලියාවේ 'ඔපරේෂන් ඕෂන් ෂීල්ඩ්' මෙහෙයුම සහ 2011 ලිබියානු ආන්ඩුව පෙරලා දැමීම මෙයට ඇතුලත් ය.
ඉහත ලැයිස්තුව එක්සත් ජනපදය සහ නේටෝව විසින් අනෙකුත් රටවල ජාතික ස්වෛරීභාවය ලේවැකි උල්ලංඝනය කිරීම් පිලිබඳ අර්ධ වාර්තාවක් පමනි. එසේ වුවද, පෝස්ට් කුහක ලෙස මෙසේ ප්‍රකාශ කරයි: “යුක්‍රේනය කෙරෙහි රුසියාවේ ආස්ථානය එක්සත් ජාතීන්ගේ ප්‍රඥප්තියේ 2 වැනි වගන්තිය යටතේ තහනම් හැසිරීමකට සමාන වේ, එය විශේෂයෙන් ‘ඕනෑම රාජ්‍යයක භෞමික අඛන්ඩතාවයට හෝ දේශපාලන ස්වාධීනත්වයට එරෙහිව තර්ජන හෝ බලය භාවිතා කිරීම’ තහනම් කරයි.”
එසේම, එක්සත් ජාතීන්ගේ ප්‍රඥප්තිය ස්වෛරී රටවල සිවිල් යුද්ධවලට සහ ඔවුන්ගේ ආන්ඩු පෙරලා දැමීම් වලදී මහා බලවතුන්ගේ මැදිහත්වීම් තහනම් කරයි. එය ඇමරිකානු සහ යුරෝපීය අධිරාජ්‍යවාදය පසුගිය වසර 75 පුරා නොගැනිය හැකි තරම් අවස්ථා වලදී නොසලකා හැර තිබේ. ඇත්ත වශයෙන්ම, කියෙව් හි වත්මන් ආන්ඩුවමත් එක්සත් ජනපදය හා ජර්මනිය විසින් අරමුදල් සපයන ලද සහ සංවිධානය කරන ලද කුමන්ත්‍රනයක නිෂ්පාදනයකි.
ඉරිදා, ක්‍රෙම්ලිනයේ නියෝජිත දිමිත්‍රි පෙස්කොව් සමඟ කතා කරමින්, සීඑන්එන් හි ෆරීඩ් සකාරියා රුසියාවේ හිටපු එක්සත් ජනපද තානාපති මයිකල් මැක්ෆෝල්ගේ මෑත ට්වීට් පනිවුඩ ඉස්මතු කලේය. දෙවැන්නා, ඔබාමා පරිපාලනය යටතේ වැඩ කල අතර, වර්තමාන ගැටුමට විසඳුමක් සෙවීමට පුටින්ට අවශ්‍ය නම් ඔහුට ඇමරිකාවේ “ඉල්ලීම්වලට” සවන් දීමට සිදුවන බව ප්‍රකාශ කලේය.
මැක්ෆෝල්ට අනුව, මතභේදයට තුඩු දී ඇති අබ්කාසියාව සහ දකුනු ඔසීෂියාව යන ප්‍රදේශවලින් සහ විශේෂයෙන්ම කලිනින්ග්‍රෑඩ් වලින් සියලු ම රුසියානු හමුදා ඉවත් කර ගැනීම ඇතුලත් වේ. කලිනින්ග්‍රෑඩ් ජාත්‍යන්තරව පිලිගැනෙන්නේ රුසියාවට අයත් භූමියක් ලෙස ය. රුසියාවේ දේශසීමා තුල හමුදා ස්ථානගත කල හැක්කේ කොතැනද යන්න තීරනය කල යුතු යැයි එක්සත් ජනපද/නේටෝ ඉල්ලීමෙන් අදහස් වන්නේ රුසියාව සිය ස්වෛරීභාවය අහිමි වීම පිලිගත යුතු බවයි. එය යටත් කරගත් රටක් මත පටවන ආකාරයේ ආඥාවකි.
මෙම සන්දර්භය තුල, සෝවියට් සංගමයට ආසන්න වශයෙන් මිලියන 30ක ජීවිත අහිමි කල 1941 ආක්‍රමනය අමතක කර නැති රුසියාවට, ජර්මනියේ ආක්‍රමනශීලී ආස්ථානය විශේෂයෙන් වදයක් විය යුතුය. ජර්මනියේ වඩාත් පුලුල් අලෙවියක් ඇති පුවත් සඟරාව වන ඩර් ස්පීගල්, එහි නවතම කලාපය තුල මෙසේ ප්‍රකාශ කරයි: 'නේටෝව අවසානයේ යුක්‍රේනයට මාරක ආයුධ ලබා දිය යුතුය.'
අර්බුදයක් සමනය කිරීමට උත්සාහ කරන විට භාවිතා කරන භාෂාව මෙය නොවේ. වොෂින්ටන් පෝස්ට් රුසියාව සමඟ ඇති වූ මතභේද සාකච්ඡා මාර්ගයෙන් විසඳා ගැනීමේ හැකියාව අවසන් වී ඇති බව ඇඟවුම් කිරීමට තරම් දුරදිග යයි.
එය මෙසේ ලියයි: 'ශීත සෘතුවේදී, රුසියානු යුධ ටැංකි සඳහා යුක්‍රේනයේ සමතලා භූමි ප්‍රදේශය හිම මුදුනු භූමියක ශීඝ්‍ර මාර්ගයක් බවට පත් වීමත් සමඟ, රාජ්‍ය තාන්ත්‍රික විසඳුමකට ඇති අවස්ථාවෙහි කවුලුව වහ වහා වැසී යමින් පවතී—ඒ, එය කවදා හෝ ඇත්ත වශයෙන්ම විවෘතව තිබුනිනම් ය.'
සාකච්ඡා සඳහා කාලය අවසන් වන බව පැවසීම, යුද්ධයක් දියත් කිරීමට සැලසුම් කරන අය විසින් භාවිතා කරන කූටෝපායක් මිස එය වලක්වා ගැනීමට උත්සාහ කරන්නන්ගේ උපක්‍රමයක් නොවේ.
දෙවන ලෝක සංග්‍රාමය අවසන් වී වසර 75 කට වැඩි කාලයකට පසුව, පැරනි සෝවියට් සංගමයේ ජනගහනය නැවත වරක් ව්‍යසනයකට මුහුන දෙමින් සිටීම, වසර 30 කට පෙර කොමියුනිස්ට් පක්ෂ නිලධරය විසින් සංවිධානය කරන ලද සෝවියට් සංගමය දියකර හැරීමේ ඛේදනීය ප්‍රතිවිපාකයයි. අධිරාජ්‍යවාදය යනු එක්තරා ආකාරයක මිථ්‍යාවක් ය සහ රුසියාව ලෝක ධනේශ්වර ආර්ථිකයට යලි ඒකාබද්ධ කිරීම සාමයේ සහ සුරක්ෂිතභාවයේ නව යුගයක් ගෙන එනු ඇතැයි යන ප්‍රකාශ වල පදනම, දැන් ඉතා ඛේදජනක ලෙස අසත්‍ය බව ඔප්පු වී ඇත.
රුසියාව දැන් මුහුන දී සිටින්නේ, නේටෝ හමුදා සහ යුද යන්ත්‍රෝපකරන එහි දේශසීමාවේ ස්ථානගත කර ඇති සහ නේටෝව එහි බටහිර දෙසින් දැවැන්ත මිලිටරි අභ්‍යාස නිතිපතා පවත්වන තත්වයකට ය.
පැන නගින ප්‍රශ්නය නම් රුසියාවට—සහ එයට එකතු කල යුතුම වන චීනයට—එරෙහි ව ගැටුමේ ප්‍රධාන උසිගැන්වීම්කරුවා වන එක්සත් ජනපදය ව්‍යසනයකට පමනක් ගෙන යා හැකි ඇදහිය නොහැකි තරම් අදූරදර්ශී පිලිවෙතක් අනුගමනය කරන්නේ මන්ද යන්නයි.
පිලිතුර සොයාගත හැක්කේ ඇමරිකානු හා ලෝක අධිරාජ්‍යවාදයේ අර්බුදයේ සන්දර්භය තුල පමනි. 1991 දී සෝවියට් සංගමය විසුරුවා හැරීමෙන් පසු, එක්සත් ජනපදය සිය ගෝලීය ආර්ථික ආධිපත්‍යයේ දිගුකාලීන පරිහානියේ පාඩු පිරිමසා ගැනීම සඳහා නැවත නැවතත් යුද්ධයට යොමු වී ඇත. එහෙත් සියලුම මිලිටරි මැදිහත්වීම් එක්සත් ජනපදය අපේක්ෂා කල දෙයට පරම ප්‍රතිවිරුද්ධ ප්‍රතිඵල ගෙන දී ඇත. 'ඩෙසර්ට් ස්ටෝර්ම්' (Desert Storm) මෙහෙයුමේ සිට ත්‍රස්තවාදයට එරෙහි යුද්ධය දක්වා, එහි මිලිටරි මෙහෙයුම් පිලිබඳ වාර්තාව ම්ලේච්ඡ, ලේ වැකි සහ දුක්ඛිත ව්‍යසනයක් බවට පත්ව ඇත.
නමුත් එක්සත් ජනපදයට 'ඔවුන්ගේ වැරදි වලින් පාඩම් ඉගෙන ගත නොහැක.' පලමු බුෂ් පරිපාලනය “ඒක ධ්‍රැව මොහොත” සහ නව ඇමරිකානු සියවසක ආරම්භය ප්‍රකාශයට පත් කිරීමෙන් වසර තිහකට පසුව, එක්සත් ජනපදය මුහුන දී සිටින්නේ, කිසිසේත්ම තාර්කික වෙනවා තබා ප්‍රගතිශීලී විසඳුම් හෝ නොවන ජාත්‍යන්තර හා දේශීය ආර්ථික, දේශපාලන හා සමාජ ප්‍රතිවිරෝධතා සමූහයකට ය.
විශේෂයෙන්ම 2008 කඩාවැටීමෙන් සහ වෝල් වීදියට ඇප දීමෙන් පසු, පසුගිය වසර 14 පුරා ඝාතීය ලෙස වර්ධනය වූ, දරාගත නොහැකි නය කන්දක් මත සමස්ත ආර්ථික පද්ධතියම අවිනිශ්චිත ලෙස රඳා පවතී.
මූල්‍ය පරපෝෂිත භාවයෙන් උසිගන්වන ලද සමාජ අසමානතාවය අති විශාල මට්ටම් කරා ලඟා වී තිබේ. අක්‍රිය දේශපාලන ක්‍රමය යනු නැගී එන සහ පාලනය කල නොහැකි සමාජ ආතතීන්ගේ ප්‍රතිඵලයකි.
වසංගතය, දැන් එහි තුන්වන වසරට පිවිසෙමින්, ඇමරිකානු සමාජය තුල ආතතීන් බිඳවැටීමේ ලක්ෂ්‍යයකට ගෙන ගොස් ඇත.
එක්සත් ජනපද මාධ්‍ය විසින් නිර්දය යුද ගැති ප්‍රචාරනය මෙහෙයවනු ලබන්නේ එතෙර සිදුවන ප්‍රධාන මිලිටරි ගැටුමක් දැවැන්ත දේශීය සමාජ, ආර්ථික හා දේශපාලන අර්බුදයෙන් මහජන අවධානය වෙනතකට යොමු කරනු ඇතැයි යන මිත්‍යා විශ්වාසය මගිනි. 'දෙවියන්, යමෙකු විනාශ කිරීමට පෙර මුලින්ම ඔවුන්ව පිස්සු වට්ටයි.'
කෙසේ වෙතත්, ඇමරිකානු අර්බුදය ඇමරිකාවට ආවේනොවේ. එය සමස්ත ධනේශ්වර පද්ධතියේ ගෝලීය අර්බුදයක කේන්ද්‍රස්ථානයයි.
වොෂින්ටනය සහ එහි සහචරයින් විසින් අනුගමනය කරනු ලබන මිනීමරු විදේශ පිලිවෙත ඔවුන්ගේ මිනීමැරුම් දේශීය පිලිවෙතේ අනෙක් පැත්තයි. කොවිඩ්-19 වලින් මේ වන විට ඇමරිකානුවන් අටලක්ෂ පනස් දහසක් මිය ගොස් ඇත. ඉතා ඉක්මනින් එය මිලියනයකට වඩා වැඩි වනු ඇත. එම මරන ගනනට බ්‍රිතාන්‍ය පුරවැසියන් 152,000 ක්, ප්‍රංශ පුරවැසියන් 124,000 ක් සහ ජර්මානුවන් 116,000 ක් එකතු කල යුතුය. ඔමික්‍රෝන් ප්‍රභේදයට බයිඩන් පරිපාලනයේ ප්‍රතිචාරය වන්නේ, සති දෙකක් තුල, නිවසේදීම කොවිඩ් පරීක්ෂනය කල හැකි කට්ටල කිහිපයක්, ආන්ඩුවේ වෙබ් අඩවියකින් ඇනවුම් කල හැකි බවට ඇමරිකානු නිවැසියන්ට පොරොන්දු වීමයි.
පාසල්, රෝහල්, අත්‍යවශ්‍ය යටිතල පහසුකම්, නිෂ්පාදනය—යන මේ සියල්ල මෙම ආන්ඩු විසින් අනුගමනය කරන මහා ආසාදන වැඩසටහනේ බර යටතේ බිඳ වැටෙමින් තිබේ. කෙසේවෙතත්, වෙලඳපොලවල් අඛන්ඩ ව ඉහල යන අතර, ඒ සඳහා කොටස් බුබුල පවත්වා ගැනීමට අවශ්‍ය අගය ඔවුන්ගෙන් පොම්ප කිරීමට හැකි වන පරිදි කම්කරුවන් ඔවුන්ගේ සේවා ස්ථානවල විලංගු ලා තැබිය යුතුය.
සමාජ කෝපය උත්සන්න වෙමින් පවතින අතර ගෝලීය මානයන්හි වැඩ වර්ජන රැල්ලක් සවි ගැන්වෙමින් පවතී. ගුරුවරුන්, මෝටර් රථ කම්කරුවන්, සෞඛ්‍ය සේවකයන්, පතල් කම්කරුවන් සහ කම්කරු පන්තියේ අනෙකුත් කොටස්වල වැඩ වර්ජන ලොව පුරා කර්මාන්තවලට පැන නගිමින් තිබේ. එහෙත් මෙතෙක් ගෝලීය ධනවාදයේ මධ්‍යස්ථානවල සෑම තැනකම මහජන විරෝධය ධනවාදී රාමුව තුල ම රඳවා ගැනීමට ක්‍රියා කර ඇති දේශපාලන ආයතන වඩ වඩාත් දිරාපත් වෙමින් පවතී. සෑම අහු මුල්ලකින් ම ෆැසිස්ට්වාදීන් එලියට එමින් සිටිති. එක්සත් ජනපදයේදී ඔවුන් කැපිටල් ගොඩනැගිල්ලේ බිත්ති දිගේ බඩ ගාමින් සිටියහ. ජර්මනියේ ඔවුන් රාජ්‍ය පාලනයේ ශාලාවල වාඩි වී සිටිති.
ධනේශ්වර සමාජය තුල ගොඩනැගෙන පීඩනය පාලනය කර ගැනීමට නොහැකිව, පාලක පන්තිය යුද්ධයට හැරෙන්නේ සමාජ කෝපය අන් දිශාවකට යොමු කිරීමේ උත්සාහයක් ලෙසිනි. මෙය තමන් තමන්ගෙන් ම ගලවා ගනු ඇතැයි සිතති; මංමුලා සහගත ලෙස බලාපොරොත්තු වෙති. නමුත් සමහර විට සියල්ලටම වඩා ලොකුම මුලාව වන්නේ මෙම ප්‍රතිපත්තියට ජනගහනයේ පුලුල් කොටස් අතර සහයෝගයක් ඇතැයි යන විශ්වාසයයි.
එක්සත් ජනපද අධිරාජ්‍යවාදයේ දුරදිග යන යුද සැලසුම් ක්‍රියාත්මක කිරීමට ඇමරිකානු හා ජාත්‍යන්තර කම්කරු පන්තියට ඉඩ දිය නොහැකි ය. පාලක පන්තියේ මිනීමරු ප්‍රතිපත්තියට එරෙහිව දේශීය අරගලය, විදේශයන්හි එහි මිනීමරු ප්‍රතිපත්තියට එරෙහිව අරගලයක් ඉල්ලා සිටී. රුසියාව ලේ වැකි ගැටුමකට ඇද දැමීම සඳහා එක්සත් ජනපදය හා ජර්මනිය ලහි ලහියේ මෙහෙයවීම නතර කල හැක්කේ ධනේශ්වර විරෝධී හා සමාජවාදී වැඩපිලිවෙලක් මත එක්සත් වූ කම්කරු පන්තියේ ජාත්‍යන්තර ව්‍යාපාරයකට පමනි.